ايه السؤال؟؟؟
طبعا اول ما شوفت اعلان المسابقة فكرت في السؤال اللي هكتب عنه،ايه السؤال اللي هبحث عن اجابتة؟، طب ولو عرفت السؤال ازاي هعرف اجابته؟ومنين؟وازاي هفكر في حاجة مختلفة ومميزة عن باقي الناس؟
وبكده هتبدا رحلتي في البحث عن السؤال المناسب
والاجابة على كل الاسئلة دي…
البحث عن الفكرة المناسبة
طبعا اول حاجة عملتها هي اني بحثت عن نماذج لاسئلة عشان اخذ فكرة عن الموضوع فلقيت اسئلة غريبة اوي اغلبها ملهوش اجابة زي مثلا ما الذي يراه الاعمى في احلامه؟ او مثلا هل يمكنك البكاء تحت الماء؟ او الحمار الوحشي،ابيض ذو خطوط سوداء ام اسود ذو خطوط بيضاء؟ او هل يتدغدغ الطيور بالريش كما نتدغدغ نحن؟ لماذا لا يلتصق السائل اللاصق داخل الانبوب الحافظ له؟ لماذا توضع البيتزا الدائرية في صندوق مربع؟ كيف تستمع لافكارك عندما تفكر؟ لماذا يوجد ضبط في محمصة الخبز يجعل الخبز محروقا لا ياكله شخص عاقل؟ اذا كان شخص يملك ارضا،هل يملك عمقها كله حتى منتصف الكرة الارضية؟ اذا اردت ان تفشل فهل ستنجح في ذلك؟ واسئلة بقى كتيرة من دي وانا طبعا اكيد مش هعرف هما ليه حطوا البيتزا في علبة مربعة ولا هعرف هو الحمار الوحشي اسود ومخطط ابيض ولا العكس انا مالي بس عمتا عشان ابقى عملت اللي عليا بحثت عن اجابة كل الاسئلة دي عشان اعرف اي السؤال المناسب وطبعا في شوية اسئلة لقيت لها اجابة بس مكفنيش اني اجاوب على الاسئلة دي بس لا انا هجاوب على الاسئلة دي وكمان هدور على اسئلة تانية عشان اجاوب عليها.
ودلوقتي هجاوب على الاسئلة دي كلها براحة
عشان اعرف السؤال المناسب
يلا بينا…
ماذا يرى الاعمى في احلامه؟
الدراسات بتقول ان الاشخاص المكفوفين بيحلموا زي باقي الناس، فالشخص اللي اصيب بالعمى من اول ما اتولد بيحلم زي باقي الناس بس مش بيشوف صور في الحلم،بس احلامه بتعتمد على حواسه التانية زي الشم واللمس.
لكن اللي فقد بصره بعد فترة من الابصار ممكن يشوف صور بالاعتماد على اللي عاشة خلال فترة ابصاره بس تجربته البصرية في الحلم محدودة باشكال والوان معينة فمع مرور السنين بتقل المؤثرات البصرية في احلامه وبتبقى مش واضحة و بيعتمد بعد كدة على الحواس التانية.
وفي دراسات و ابحاث كتير اللي اتعملت على المكفوفين انهم بيحلموا بس مبيعرفوش يفسروا الاشكال اللي حلموا بيها كمان مبيعرفوش يشوفوا صورة نهائية للناس و الحاجات، ومش بيفتكروا اغلب احلامهم عشان بتكون عبارة عن صور خالية تماما من المؤثرات البصرية ، وغالبا بتكون احلام الناس المصابين بالعمى صوت بس ، عشان الصوت و الكلام هو الطريقة الوحيدة اللي بيتعامل بيها الاعمى مع الناس عشان كدة بيكون الصوت هو الاساس في احلامهم.
كمان الاديبة والناشطة الامريكية الشهيرة هيلين كيلر واللي كانت كفيفة وصماء قالت ان احلامها قبل ما تقابل مدرسها كانت من غير اي مؤثرات صوتية او بصرية او حتى فكرية، وانها كانت عبارة عن احساس بالخوف ومشاعر تانية مش واضحة بس احلامها اتغيرت بعد الدروس اللي اخدتها من مدرسها.
كمان كان في باحثون دنماركيون حاولو يوصلو لحقيقة احلام المكفوفين عن طريق تجربة تطوع فيا 50 شخص بالغ 11 منهم مكفوفين منذ الولادة و 14 منهم فقدوا البصر بعد سنة من ولادتهم و 25 شخص مبصر، و18% من المشاركين المكفوفين قالوا ان هم تذوقوا طعم في حلم واحد على الاقل و 30% منهم قالوا ان هم شموا رائحة واحدة على الاقل في الاحلام.
هل يمكنك البكاء تحت الماء؟
آلية الجسم في البكاء تحت الماء هي ذاتها فوق الماء عشان كدة نقدر ننزل دموع بس هتخطلت بباقي المياه.
بس الدموع دي جزء صغير من العياط او البكاء زي ما بندمع لما نقشر البصل او من الدخان او الحساسية لان الدموع دي بتيجي من القنوات الدمعية ومش مهم المكان او التوقيت ففي اي وقت الدموع ممكن تنزل عادي بس ده بيختلف تماما عن البكاء لان زي ما قولت الدموع جزء صغير من العياط خصوصا لما نتكلم عن البكاء العاطفي و اللي بيحصل لما نعدي بموقف مؤلم و صعب.
بس خلي بالك لان البكاء تحت الماء ممكن يتسبب بالوفاة ، معظمنا بيعيط لسبب معين نتيجة موقف او حدث عاطفي دا معناه اننا
